'堂口' 兄弟

彩色照片提供: 義少, 龍哥&堅兄


上星期六係堂口嘅130週年晚宴,
我地呢班分離五湖四海嘅兄弟們又再次聚會啦!
真係要多謝西門兄嘅努力付出, 聯絡番我地呢班兄弟們!
而今次出席嘅兄弟人數, 就比上次多左好多!

堂口每一年都培養出一大批新人,
所以呢次週年晚宴, 會有唔同年份嘅人仕出席;
而為其壯大我地呢一邦93年兄弟嘅聲勢,
個個就特登著起由小弟設計嘅衫,
表示我地係同心一體!

一到晚宴門口, 就見到個個著住件衫企係度,
個場面好不壯觀~ 有圖為證架, 冇呃你o架!


放心! 我地唔係去劈友~ 而係去飲!


成班兄弟聚集之後, 就滾滾浩蕩咁入去報到啦!


呢個兩年一次嘅晚宴, 就設立係擁有130年歷史嘅堂口聖地.
話明有130年歷史, 個晚宴場面就梗係唔係野少啦!
你睇下!


好多嘅兄弟都係難得17年後再聚舊...


晚宴開席前, 由已退休, 但仍受歷屆兄弟尊敬嘅話事人主持敲鐘儀式,
冇錯! 話事人係外國籍人仕!
唔講你唔知, 我地呢個堂口係由外國人設立o架!


跟住校歌就奏起~ 宴席開始!


校歌? 冇搞錯! 真係校歌~
我所謂嘅'堂口', 咪就係學堂囉!
話事人? 學堂嘅話事人咪就係校長囉!

成班黑衣人, 似唔似黑社會呢?


130週年晚宴咁大場面,
梗係要放爆仗贈一贈興, 咁先至似樣嘛!


93年百厭星齊齊到二樓影番張相留念~


班百厭星又番到以前教室攪攪震~
難得嘅係Mi士又陪我地一起癲~


闊別多年再聚, 循例都要在來個大合照嘅~


癲又癲完了, 大合照又影了~
都係時候做d大家當年係學堂想做又唔做得嘅野~
係乜? 就係飲酒同燒煙啦!


睇下班友仔飲得幾high~~


難得聚會, 而班友仔又飲得咁high, 點都唔會夠嘅喇~
所以晚宴一完, 就直剷到friend嘅pub,
開始第二場嘅歡飲; 直到凌晨3點幾....


後記: 值得一提, 我地學校間廁所,
係馬六甲學校內, 最大, 最豪華兼最乾淨o架!